نكت فودافون و موبينيل

كنت فى مركز خدمة موبينيل، وقاعد جنبي واحد، كل الرقم ما يتغيّر يسألني:
- دوري دا يابنى؟
= لا يا حج مش دورك
- اه يا حرامية يا ولاد الكلب؟
= ........؟
*عميل رقم ٢١٤ شباك رقم ٢*
- دوري دا يابنى؟
= لسة ياحج شوية
- فلوسى يا ولاد الحرامية، والله مانا ماشى غير لما اخدها
وهكذا.. فضل على الوضع دا لغاية ما واحد كان عليه الدور، اداله رقمه وخلاه يدخل مكانه. 
وقف الحج على الشباك، وقدامه بت "كتكوتة" كدة، قالتله:
-- مساء الخير يا فندم
- بلا مساء الخير بلا بتاع.. انا مش هتكلم غير قدام الراس الكبيرة
-- راس كبيرة ايه يا حج.. هو انت فى المدبح؟.. قول مشكلتك وانا هساعدك
- لا انت مش هتعرفى.. انا عاوز حد كبير
-- طيب جربنى ولو ماعرفتش هخليك تكلم حد كبير
- شحنت كارت بـ١٠ ورنيت على الولية، لقيت واحدة حلوة زيك كدة بتقولى "لقد نفـ.. لقد فنـ.. لقد خلص رصيدكم" وقبل ما اقولها انى لسة شاحن، قفلت السكة فى وشى
انا عاوز اعرف البت دى قفلت فى وشى ليه؟.. اكمنى غلبان ولابس جلابية وطاقية يعنى
-- دا على اساس انها شايفة لبسك فى الفون!
- ماعرفش بقى، المهم.. بعد شوية بعتتلى رسالة ان الشركة خصمت الـ٩ جنيه اللى كنت مستلفهم
-- طيب تمام.. انت عاوز ايه دلوقتى؟
- عاوز اعرف فين باقى فلوسى يا شوية حرامية
-- استغفر الله العظيم، فلوس ايه ياحج بس؟
- انا شحنت بـ١٠ وانتوا اخدتوا منهم ٩، يبقى ناقص جنيه.. انا عاوز الجنيه بتاعى دلوقتى.. ولا اكمنى غلبان ولابس جلابية وطاقية، هتضحكوا عليا
-- ياحج نضحك عليك ايه بس؟.. إفهم...
- أفهم؟.. اكمنى غلبان ولابس جلابية وطاقية، فاكرانى مابفهمش
-- ماقصدش ياحج لا سمح الله، انا عاوزة افهمك ان الشركة بتاخد على كل ٣ جنيه نص جنيه.. يعنى الـ٩ جنيه بيتخصموا ١٠ ونص، يعنى انت دلوقتى عليك للشركة نص جنيه 
- بس دا يبقى ربا.. اكمنى غلبان ولابس جلابية وطاقية، فاكرين انى هقبل الحرام
-- ياحج حرام عليك انت، ماتخرجنيش عن شعورى
- هو اكمنى غلبان ولابس جلابية وطاقية، هتزعقيلى
برطمت البنت بكلام مش مفهوم، بس انا توقعت انه:
-- يخربيتك على بيت الجلابية والطاقية
- بتقولى ايه؟
-- مابقولش ياحج.. مابقولش
- طيب انا عاوز الجنيه رصيد.. ماليش دعوة
-- استغفر الله العظيم يارب.. طيب ياحج قول رقمك وانا هحوّلك جنيه من معايا
- زيرو عشرة تسعـ...
-- زيرو عشرة؟ دا رقم فودافون ياحج
- لا والله دا رقمى!
قالت "لفظ اعتراض" ودى كانت اول مرة اسمع لفظ زى دا فى مكان زى دا لا وكمان اللى بتقوله "بنت".. الحج تنَّح، فهى كملت:
-- انا عارفه انه رقمك، بس تبع شركة فودافون، وانت هنا فى فرع موبينيل
- ماليش دعوة.. انا عاوز فلوسي 
-- ياحج اطلع برة اركب تاكسى وقوله يوديك فودافون.. وهناك هيدوك فلوسك
- اركب تاكسي بـ٥ جنيه عشان يدونى جنيه.. اكمنى غلبان ولابس جلابية وطاقية هتفتكرينى مغفل؟
-- طيب ياحج قولى اعملك ايه دلوقتى؟
- ابعتيلى الجنية وابقى خديه انتى من فودافون
-- ماينفعش ياحج
- خلاص قعدينى مع الراس الكبيرة، زى ماقولتلك فى الاول
-- والله لو قعدت مع نجيب ساويرس نفسه مش هيفيدك
- مين دا؟
-- دا اكبر راس فى الشركة هنا
- طيب قعدينى معاه
-- ماينفعش
- خلاص ابعتيلى جنيه انتى
-- ابعتلك جنيه ازاى وانا موبينيل وانت فودافون 
- انا ابراهيم مش فودافون
-- يانهار اسود.. خد ياحج ١٠ جنيه اهى واطلع برة.. غور من وشي ياعم
- ربنا يخليكى.. الهى يارب امك تحج، وابوكى يحج.. وصاحب الشركة، اللى اسمه ملخبط دا -الراس الكبيرة- هو اسمه ايه؟
-- تقصد نجيب ساويرس؟
- ايوة هو دا.. يارب يحج
-- بس دا مسيحى يا حج
- عشان كدة بتعاملينى وحش.. اكمنى مسلم غلبان ولابس جلابية وطاقية.. بتعملى معايا فتنة طائفية
كرشوه ونادوا الرقم اللى بعده، لغاية ما جه دوري.. خلصت وطالع، لقيته واقف برة.. افتكرته تايه، فروحت سألته:
= انت تايه ولا حاجة يا حج؟
- تايه؟.. هو اكمني غلبان ولابس جلابية وطاقية، هتفتكرنى بتوه؟
اتقتلت ضحك.. وبعدين مسكت نفسي وقلت:
= لا ياحج اصلك واقف من بدرى يعنى
- عاوز حد يودينى فودافون.. اخد فلوسى منهم ولاد الحرامية